Անթիրինում մեծ (Շան բերան) - Львиный зев - Antirrhinum Majus

Բազմամյա խոտաբույս է, որի ընձյուղների հիմնային մասը փայտանում է: Տաք ձմեռների դեպքում տերևները չեն ցրտահարվում, և բույսը հաջողությամբ ձմեռելով` հաջորդ տարի առատորեն ծաղկում է: Ցուրտ ձմռան դեպքում վերածվում է պայմանական միամյայի:

Ծաղիկները հավաքված են հասկանման ծաղկաբույլերում և ունեն ամենատարբեր գունավորում, հանդիպում են նաև երկգույն ծաղիկներ: Պատկանում է խլածաղկազգիների ընտանիքին:

Լուսասեր է, բավականին ցրտադիմացկուն: Գերադասում է կավաավազային, հումուսով հարուստ, խոնավ հողերը: Չոր ու շոգ եղանակի ընթացքում առատ ոռոգման կարիք է զգում:

Անթիրինում մեծ  (Շան բերան) - Львиный  зев - Antirrhinum Majus

Բազմանում է սերմերով, հազվադեպ` կտրոններով: Սերմերը մարտի սկզբին ցանում են արկղերում, ծիլերը վերատնկելով ջերմոցի հողում: Խորհուրդ է տրվում սածիլների գագաթը ծերատել, լավ թփակալելու համար: Ծիլերը  վատ են տանում խոնավության ավելցուկը: Բաց գրունտ են տեղափոխում մայիսի կեսերին: Այն վայրերում, որտեղ ձմեռները մեղմ են, բաց գրունտ են տեղափոխում նոյեմբերին` հաջորդ տարի վաղ ծաղկելու համար: Օգտագործվում է ծաղկանոցներում, եզրաշերտերում, միքսբորդերներում, ինչպես նաև որպես կտրած ծաղիկ օգտագործելու համար:

Ամենուրեք լայն տարածում գտած և մասսայական կարգով օգտագործվող ծաղկատեսակ է:  

Հարցեր, պատասխաններ, մեկնաբանություններ